Gustakh dil.

Koi bata de hume,

Is gustakhi ko kaise maaf kiya jaaye?

Jinhe basa liya tha rag-rag mein,

Dil ko kaise unke khilaaf kiya jaaye?

Akhir kyon dharti par reh kar,

Chaand ko pane ki khwahish ki humne?

Badi mushkil se to dosti ka naam dekar,

Is rishte ki numayish ki humne.

Jab bhi hum ne hosh khoya,

Us khuda ne diya ishara;

Samajh gaye use, aur dil par patthar rakh kar,

Kiya faisla , ki yeh na hone denge dobara.

Phir na jane kyon na rok paye khud ko,

Khone lage nashe mein, kaisa yeh mazaa hai?

Jab dard mila, toh utha phir wohi sawaal,

Ki yeh kis gunaah ki sazaa hai?

Hothon ko toh hum see bhi de,

Aankhen bata dengi, mann mein jo pigaam hai;

Har waqt is kashmakash mein junjhte rahen hum,

Yeh zindagi ka kaisa mukaam hai?

Na dhoondh paye hum un mein kuch aisa,

Ki hume unse nafrat ho;

Na jaan paaye , ki unke mann mein kya hai;

Khayaal aaya, shaayad unhe bhi humse mohabbat ho?!!

Kahin na kahin hume maloom hai,

Ki is ‘shaayad’ ki koi gunjayish nahin;

Hum dono ki duniya hi itni alag hai,

Ki khuda se hum kar saken aisi yeh farmayish nahin.

Agar dua kaam aati ho ishq mein,

Toh hum yahi dua karenge;

Ki rok le hum khud ko aur,

Umra bhar unke dost banke khade hua karenge.

Yahi hai humari kismat ki hum,

Muskurakar aansu piya karen;

Pal-pal ehsaas ho ki nahin bane hum ik-duje ke liye,

Phir bhi saans le, aur unhi ke liye jiya karen…